Hashar o‘zbek xalqining azaliy urf-odatlaridan bo‘lib, jamoaviylikni o‘zida to‘liq aks ettiradi. Birdamlik, samimiylik, ahillik, mehnatsevarlik, o‘zaro hurmat va mehr-oqibat tuyg‘ularini yana-da mustahkamlaydi.

Azaldan o‘zbek xalqi hamjihat bo‘lib, hashar yo‘li orqali ariqlar qazib suv keltirishgan, ko‘priklar, yo‘llar qurishgan, hududlarni obod qilishgan.

Pastdarg‘om tumani Guliston mahallasidagi Qoqcha qishlog‘ida yashovchi hamjihat fuqarolar ham aynan hashar yo‘li orqali bir qator ezgu ishlarni amalga oshirmoqda.

Jumladan, mahalladagi Halovat qabristoni 600 metr masofadagi qo‘rg‘on devor bilan to‘liq o‘raldi, kirish qismida esa, 240 kvadrat metr beton yo‘laklar barpo etildi.

Shuningdek, qishloq hududida voleybol, futbol, workout kabi sport turlariga mo‘ljallangan maydon qurilib tungi yoritgichlar va boshqa zarur qurilmalar bilan jihozlandi.

Bundan tashqari, "Yashil makon" loyihasi asosida manzarali daraxt ko‘chatlari ekilib, tomchilatib sug‘orish tizimi yo‘lga qo‘yildi.

Shu kabi, ushbu hududga tomorqada foydalanish uchun zarur bo‘lgan suv keluvchi ariq maxsus texnikalar jalb etilgan holda qayta taʼmirlanyapti.

Tuman hokimi Sh.Rahmonov tuman prokurori hamrohligida ushbu amalga oshirilayotgan ishlar bilan tanishdi.

Aholining o‘z yashash hududini obod qilish borasida inoqlikda olib borayotgan mazkur ishlarini eʼtirof etib, bu kabi ishlar boshqalarga ibrat ekanligini taʼkidladi.