Туман ҳокимининг маърузалари

Пастдарғом туман ҳокими С.Эргашевнинг XI “Шарқ тароналари” халқаро мусиқа фестивалидаги

нутқи

 

Хонимлар ва жаноблар!

Қадрли фестивал қатнашчилари!

 

Сизлар билан мамлакатимизда XI бор ўтказилаётган “Шарқ тароналари” халқаро мусиқа анжуманида дийдор кўришиб турганимдан ғоят мамнунман.

“Шарқ тароналари” мусиқа фестивали Ўзбекистонда, айни Самарқанд заминида ўтаётгани бежиз эмас. Самарқанд ҳақли равишда дунё цивилизацияси бешикларидан биридир.  Бу тупроқда не-не давлат ва фан арбоблари, санъаткор ва ижодкорлар дунёга келдилар ва ижод қилдилар. Бу замин азал-азалдан турли халқ вакиллари ва маданиятлари учрашган замин бўлган, десак асло адашмаган бўламиз. Айнан шу заминда бундан 20 йил муқаддам “Шарқ тароналари” мусиқа фестивалига асос солинди. Ҳозирда бу фестивал халқаро майдонда эътибор қозонган, нафақат Шарқ, балки Ғарб дунёсининг кўплаб санъат намояндаларини ҳам ўзига жалб этаётгани унинг қисқа муддатда ажойиб анъана ва катта нуфузга эга бўлиб бораётганидан далолат беради.

 

Азиз меҳмонлар!

 

Мусиқа санъатининг минг-минг йиллар давомида инсонлар қалбига юксак ва беғубор туйғуларни жо этиб келаётгани, бу ёруғ оламни янада мунаввар қилиб кўрсатадиган илоҳий мўъжиза экани барчамизга аён. Айниқса, инсоният мураккаб технологиялар, глобал муаммолар, шиддатли тараққиёти асрида яшаётган бугунги кунда руҳий эркинлик ва юксаклик намунаси бўлган бу санъатнинг ҳаётимиздаги ўрни ва қадр-қиммати бениҳоя ортиб бораётганини ҳеч ким инкор этолмайди.

Шу маънода, ушбу фестивал бутун дунё маданиятининг гавҳару дурдоналари бўлмиш ўлмас мусиқа асарларини оламга янада кенгроқ танитиш, мумтоз тароналардан барча нафосат шайдоларини баҳраманд қилиш, янги истеъдод эгаларини кашф этиш борасида ҳам катта аҳамиятга эга

Аминманки, Сизларнинг гўзал санъатингиз Шарқ ва Ғарб мусиқа дурдоналарини бутун дунёга яна бир бор намойиш қилади, “Шарқ тароналари” мусиқа фестивали халқларимиз маданиятини ўзаро бойитади, куй ва оҳангларини янги босқичга кўтаришга хизмат қилади, ҳар бир одамни меҳру шафқатли, оқибатли бўлишга даъват этади, ер юзида барқарор тинчлик ва аҳиллик руҳини уйғотади.

Аниқ айтаоламанки, бетакрор ва саховатли ўзбек диёри, унинг мафтункор табиати, айниқса, бағрикенг, меҳмондўст халқимиз билан бўладиган самимий учрашув ва мулоқотлар сизларга хуш кайфият ва янги илҳом бахш етади.

 

Туманимиз аҳли!

 

Ҳеч қандай шубҳам йўқки, сиз, биродарлар фестивал иштирокчилари ва меҳмонларига уларни қўллаб-қувватлашда ўзбек халқига муносиб меҳмондўстлик ва бағрикенглик фазилатларини, албатта, намойиш этасизлар.

Яна бир бор Сизларни “Гўзал Ўзбекистон тупроғи, кўҳна Самарқанд заминига хуш келибсиз!” деб чин кўнгилдан қутлайман.

2015-2019 © Пастдарғом туман ҳокимлиги. Сайт яратувчиси: SAKTRM